Sasi Ruwah Ing Pasareyane Eyang

Eko Nuryono

sinegsenan suket-suket lan gegodhongan
nalika srengenge alon-alon mapag tekane surup
aku mung bisa sedheku nyawang ukiraning watu
tanpa sumrepete kembang boreh lan telon
tanpa kumeluse dupa lan kemenyan
marang eyang, donga bekti putu lanangmu iki
dak gelar ing pusere pasareyanmu iki
moga-moga gusti paringo dalan padhang
tinampa sakkabehe amal kesaenan
kinampurano kabeh luput kesalahane eyang

ah, isih krasa gumayang esemmu nalika semana
pitutur ngenani lakune urip isih rapet dak bundheli
najan donyamu-donyaku wis kasingged pati
nanging wewarahmu dadi pusaka aji
kanggo jangkahku nepaki lakuning urip agung iki

Kasongan, Juli 2009