SANGGAN

Dening J Sumarto

Saumpama

Sliramu pirsa sing ndak gawa

Kamomotan trisna

Kang mbok sisipake ing atiku

Temtune, Luh bakal rumembes

Saka endahe netramu

Waspa ora bakal kendat

Tumurun nelesi bantala Iki

Lan lumintang bakal surem

Ing atimu

Sliramu

Amung wewayangan kapang

Sajerone ngadebi urip

 

250622

TANGISE BUMI PERTIWI

 Dening J Sumarto

Sabanjure,

Getih luntur ing bantala

Luh dlumewer saka netra

Nyawang ing kaca

Para putra bangsa

Andum tembang sesongaran

Para paraga

Nindakake laku pancakara

Melik Urip kadonyan

Rungokna pasambat lara

Bukaken kupingingmu

Ana sesambat ngayuwara

Kang Nandang lara

Rerintihan

Kadya jangkrik ngerik

satengahe unine bedil gas

Apa sliramu mentala

Nyumurupi kahanan punika

Apa hora ana ing jiwamu

Rasa duhkita ?

Mbok uwis

Dilereni pancakara iki

luwih aji bangsa

Tinimbang kekareban dadi panguwasa

230519

KLAYAR

 Dening J Sumarto

Gumuruh ombake samudra

Gulung gumulung lumaku

Kagiring sumilire angin

Ing pinggire samudra biru

Kadya nom-noman, lumayu

Nguber penine lelumban asmara

Endah pancen endah donya

Ing wektu iku,padha guyon bebarengan

Lan kalane sikil iki lumaku ing pinggir

Napaki butir-butir pasir putih

Jumangkah aku ngadek ing karang

Guwang panyawang ing tengah segara

Ngadek, gejejer lan gemeter

Meruhi lakune banyu sansaya banter

Ing kene aku katon cilik

Ora duwe daya kanggo nglirik

Kapal layar lan pesiar

Amung dadi satitik

Mulat satengahing urip

Ubyang ubyung mung nglilip

Tan ana eling marang sing gawe urip

J sumarto,120316