NgGandul....

Dening ; Kang Raden

geyang-geyong tak rewangi nggembol suwara
suwara mau mung klesiking nala
ora ana ...sapa wae sing weruh
amung ati iki sing tansah ngreridhu

sejatine sliramu damang
marang sakabehing suwarane atiku
nanging sliramu kaya njarag
supaya ora ora weruh

kabeh wis tak sandhang
ora apa-apa....
muga betah apa sing tak kandha
muga anteng sajroning kreneng

atiku nyuwara aneh
banjur aku kudu piye....?

( 150914,kang raden ) kagem slirane.

Lelakon

Dening ; Chimin Why

lika likune lelakon
kadang kaku kebak pitakon
takon tan ana wangsulan
pating prentul kadya suket
nedenge tukul ing mangsa rendeng

kang bungah padha jumangkah
kanthi gleyah gleyah nadyan laku salah
kang susah nyebar panggresah
ana sing meneng nanging kanthi nggremeng
kadya kombang ambrengengeng

Gara Gara,,,

Dening : Indra Yudha P

Parak esuk nglumbrang gandaning puspita
Gebering wayah kawiyak
Bubrah

Apa wis wancine….
Jagad sak isine….
Jalma sak asmane ilang sebute?
Bumi bengkah gonjang ganjing.
Alas suwung tanpa tanduran
Sato kewan nunggal dadi wataking jalma

We……lhadalah!
Jalma dadi kaya tikus clurut
Sembarang kang ana dimangsa
Kewan- kewan isih duwe rasa welas
Jalma babar blas!

Wong padho nglethak wong
Saben dina ribut mburu benere dhewe.
Kemprungsung
Pungkasane kabulet bandha..
Rasa kamanungsan mati
ditunggangake bandhosa kaserakahan.

Gara –gara Jabatan dadi jotosan
Dhuwite negara dadi rayahan
Gara-gara dhuwit,pitenah kawudal
ilang paseduluran, dadi iri dengki srei kang tuwuh.
Permusuhan lemu ginuk-ginuk
Mlaku- mlaku ing atine para kawula.
Gara-gara nafsu, anak tega diuntal dhewe
Mata melek naging ora wanuh
Kuping krungu nanging ora ngerti.

Wee…….lhadalah!
Gara-gara…
Kawula wani nglamak marang panguwasa
Amarga panguwasa daksia.
Gara –gara..
Apa isih ana ati kang tulus iklas
Kang nyebar katrenan tulus.

Wengi Iki

Dening : Indra Yuda Pratama

Lampu remeng-remeng
Sadalan-dalan kebak kupu-kupu lan jangrik

Padha gegojegan, padha jejogogedan
Nyebar madu racun

Nanging Dewa daru isih gagah wibawane

Sansaya suwe tangan-tangan gumratil golek
senenge

Kaya semut ngrubung gula
Sinawung eseme ana lara tangise
Linali cedake swarga lan neraka

Aku mung gumuyu gegirisi ati
Uga sing liya wis ora peduli liya
Ngunggungake “apatis” lan “egois”

Aku mesthi padha, nyata iki meneng wae
Mung sinawangan lan ngademke ati

Kuping

Dening ; Irul S Budianto

kupingku kupingmu kupinge sapa
kuping sing mujud saka trekahe mangsa
lan swara-swara sing pijer mbenging
kaya nggugat playune bedhidhing

kupingku dudu kupingmu
dumadakan budheg yen krungu swaramu
lumer nanging bisa mecahake watu!

Hotel Lor In, Sept. 2014

Durung

karipta dening ; Kang Raden

apa wis ana kabar
anginku kang sumilir?

pancet wae kaya wingi uni
isih mlompong kaya kayu growong

apa wis tok kirim pawarta dhek semana?
kowe manthuk karo mesem

banjur ngapa kowe mrene?
ajeg manthuk kaya wingi kae

mbok gage ndang digawa mrene
pakabaran wingi kae
amung mesem karo ngethut lambe

umpama wis tak tampa kabar gumbira kuwi
aku banjur nanggab wayang sedina sewengi

aku karo mesem ngguyu
karoban ing segara madu

anginku kang sumilir........

( 250914,sliramu )

YEKTINING MARDIKA

Geguritan : Ratmaya Urip

Kamardikan iku dudu paraning punagi
Amung purwakaning atur, pikir, lan laku
Tumujweng kasunyataning panggayuh
Kanggo praptaning rahayu, basuki, adil, makmur lan raharjaning bangsa
Uga kanggo mijiling kasampurnan jati tumrap nusa
Kanti olah kridha pikiran lan laku kang sak mesthine lan sak benere
Tumujweng jayaning negara
Supaya adoh saka reribeting catu lan kala bendhu
Cedhak ing guyup, rukun, rosa lan santosa

Kamardikan kuwi prapta dudu amung nawala
Nanging uga caraka kanggo yektining panggayuh
Uga marganing jangkah kanggo mijiling mongkog kang jati
Kanggo yektining adil makmur, tata titi tentrem karta raharja
--------------------- --
Dirgahayu lan tansah Jaya Republik Indonesia
Pondok Kelapa-Duren Sawit-Jakarta Timur, 17-08-2014

Ing Wengi Sepi

Dening ; Kidung Wayah Wengi

Lungguh ing wayah ratri tanpa kanca 
Pedhut peteng dadi kemule akasa 
Ati kebak panggresah nalika kelingan
Praupan kang tansah dak kangeni
Sakdawane wektu....
Pangangen ngulandara sak antaraning mega
Adoh sajeroning pasepen
Getering asmara sansaya ndadra
Kapangku tan kena cinidra
Wengi sepi iki......
Kepengin dakkidungake gatra-gatra asmara
Kanggo sliramu ing kana
-------------------------------
(0926-170814)

Tumpang Sari

Dening : Bambang Paijo Utama

Gonjang-ganjing wismaning pertiwi wis lerem
senajan angin semilir durung krasa adhem
kadhang isih ana besutan lisan tanpa nata papan panggonan
tundhone nglelara atine liyan
kang mimpang nebah dhadha mungalke jangga
sing kalah dadi salah mergo emoh kalah
terus kena apa ora nyawiji
guyup rukun ngrumat negari ?

Lelakon wingi kaya dene ngimpi
kang kebak tindak iri dengki lan srei
dene saiki critane beda ,-
crita bangsa kang kebak pangarep-arep
lemah garapan butuh tanduran
senajan beda thethukulane ning nyawiji mancep ing bumi
dhasar garapan tumpangsari
garapane putra-putri pribumi
siji lan sijine manunggal dadi sak rasa ,-
rasa neng lathi uga rasaning ati
kawusanan bisa murah sandhang murah pangan
negri neki gemahripah loh jinawi.

@penatua.2282014

Ngayogyakarta

Dening : Ratmaya Urip

Nalika Ngayogya prapta ing telenging galih
Kapang iki tansah kadhedher kebak ing wektu
Ngalem mring rasa lan nyuwek punagi
Ngarih-arih andrawina mring prasasti
Kang wegah sirna utawa mlayu
Karana sliramu pancen angel ninggalake wektu
Lan kapang iki nyatane ora nate layu
Klayu mring pasihmu
Tansah memayu hayu